-كنت مربوط بخيط من دهب شاددني من عيوني وماعم اقدر شيل نظري عنهن.. كانوا عم يحكوا مع بعض بهدوء واقفين وعم يتمايلوا.. في وحدة كانت بآخر الليوان عم ترقص وتدور لحالا.. وكأنها بحضرة، مغمضة عيونها ونسيانة العالم.. ووحدة تالتة كانت قاعدة وحاطة رجليها بقلب مية البحرة وعم تتطلع على المي.. وعم تفكر مابعرف بشو.. وفجأة هي يلي بالبحرة رفعت راسها وبضربة وحدة وكأنها شايفتني، اتطلعت علي وعملتلي باي. العمى حسيت حال قاعد بالزلط، قدام كل أهل الحارة، يارب ارحمني .. ارحمني..

-قلتله: بس ياشيخنا شفتها وهي عم ترقص!

فقال: الرقص أقرب طريق للإنسان ليتقرب من الله وهو أول صلاة ابتكرها المؤمن ليقترب من الروح والذات الالهية.. لاتخاف طالما قلبك مغمور بالحب فأنت دائماً على حق، وكل الطرق اللي رح تمشي فيها رح توصلك، طالما بوصلتك الايمان.. وأكبر دليل هو السكينة اللي منحك ياها الرب.

-وكنت أنا متل الحشرة هداك اليوم، ماكان في حدا منتكش فيني، وأنا اللي كنت الصبي الوحيد على خمس بنات والمدلل يعني آخر العنقود والسكر المعقود، حسيت في شي غلط في شي مو صح، كنت رح أبكي قالتلي أمي هاد صحن الفواكه بينحط قدام العرسان على الطاولة وكلوا كرز وخوخ والذي منه، بس قالتلي أوعك تاكل منو وتدبغ حالك لأنو بدي أخلص بواحد بس اليوم، كيف اتنين، اكيد اختك راح تدبغ كل أواعيها وفستانها الأبيض وقت ترقص هي وعريسها الله يخليك دير بالك.

-بس خلص بس! وتضمه إلى صدرها بحنان – صمت ثم تتابع – وبقينا نحكي ونحكي ونتمشى، مشينا يومها لساعات تحت الغيم.. السما ماشتت يومها، وشربنا الشاي بالقهاوي، وقعدنا على الأرصفة.. اشتريتلي ورد أبيض بيجنن.. يا الله أسرتني يومها..

كل العالم بيقولوا خسى الديب.. لأنهن مابيعرفوا الديب منيح.. يمكن أنا عرفتو.. ياترى حدا منكن شي مرة راح لعند الديب وطلب منو طلب..؟ أنا رحت ولباني..! حسيت بالحب وقلبي لأول مرة بحياتي دق..