مقاطع من "صدى"

-صرت من منسياتك.. من الأشياء القديمة بحياتك متل أي شي تاني.. متل علبة ألوانك.. وقت يلي بتكون سكران بتنساها مفتوحة وبتكبها.. أنا ماعاد انفعك بشي.. غيري عم ينفعك.. خليك هيك لاتتغير.. أوعك تتغير.. عامل حالك عبثي.. عامل حالك عبثي على أساس فنان ومو فارقة معك.. وكل شي مباح.. تضرب أنت وفنك التافه.. من وقت ماعرفتك وأنت بتدين وبتشحد.. وقت يلي مابتلاقي حدا يدينك بتقول يضرب حظي وساعته. على أساس أنت ملتزم.. ليش أنت بتعرف شي عن الالتزام.. بتعرف يعني شو أنو الواحد يكون نضيف.. بتعرف يعني شو أنو الواحد يكون مرتب.. أنت مابتعرف شي.. أنت بتعرف القشور وبس.. أنت جواتك واحد فاضي.. واحد فاضي.. أناني..

-كان نيسان وكان الياسمين هادد وهابب بالشام.. وقتها رحت لباب بيتك وكان بيتك قبو.. رحت عاجناين الورد وبالصدفة أنت كنت ساكنة بجناين الورد.. أخذت كيسين زبالة كبار سود وعبيتهن ياسمين بما أنو الشام هابة بالياسمين.. عبيتهن للطفحة.. وفردتهن قدام باب بيتك..

مقاطع من "فوضى"

-أنا مابخاف من شي ولامن شي ولاأي شي بالدنيا ممكن يخوفني.. أنا مابخاف من رفقاتي يكذبوا علي يستغلوني وبحكي أي شي قدامهن.. أنا ماكنت بخاف.. مابخاف.. مابخاف من شي ولاشي بالدنيا ممكن يخوفني.. أنا مابخاف من اللون الأزرق.. من السباحة من البحر من المي.. مابخاف إمشي لحالي تحت الشتي.. أنا مابخاف من الشباب.. من الرجال.. من المواعيد..

-بعد مافقت من النوم بلاقي حالي حبيتو.. قال بشوف حالي صبية بنت خمستعشر سنة وعم بمشي عالدقة ونص.. فجأة بشوف أبو صطيف جارنا.. قاعد عم يخبز الخبز وعم ياكل بطيخ.. طلع فيني وقللي خدلك حز ياجميل.. أخدت الحز وصرت آكل.. آكل .. آكل.. كانت أطيب بطيخة بدوقها بحياتي.. وحلوة.. حلوة .. ودافية .. بعدين بلاقي حالي بفستان العرس.. بلتفت هيك مابلاقي أبوصطيف.. مات.. كنت عم بحلم..